തെയ്യങ്ങൾ കണ്ണൂരിന്റെ മുഖമുദ്രയാണ്. തെയ്യക്കോലം കെട്ടുന്നതിന് തീരുമാനിച്ചിരിക്കുന്ന ആൾ നാട്ടിലെ ഒരു സാധാരണക്കാരനായിരിക്കും. പക്ഷേ ഇദ്ദേഹത്തിന് വളരെയേറെ തയ്യാറെടുപ്പുകളുടെ ആവശ്യമുണ്ട്. തെയ്യമായി മാറിക്കഴിഞ്ഞാൽപ്പിന്നെ ദൈവത്തിന്റെ പ്രതിരൂപമാണ് തെയ്യക്കോലക്കാരൻ. അനുഗ്രഹവും മഞ്ഞപ്പൊടി വിതരണവുമെല്ലാം തെയ്യത്തിന്റെ ( ദൈവത്തിന്റെ ) വകയായി ഉണ്ടാകും. അമ്മയോ അച്‍ഛനോ മുന്നിൽ വന്നുനിന്നാലും തെയ്യത്തിന് ഇവർ ഭക്‍തർ മാത്രം. പക്ഷേ തന്റെ ചിത്രം എടുക്കാൻ വരുന്ന പത്ര ഫോട്ടോഗ്രാഫർമാരോട് ദൈവമായി മാറിയ തെയ്യത്തിന് പ്രത്യേക മമതയുണ്ട്.
2003 കാലഘട്ടം, കണ്ണൂരിലെ ഒരു ചെറിയ അമ്പലത്തിൽ തെയ്യം നടക്കുന്നു. അന്ന് ദീപികയുടെ ഫോട്ടോഗ്രാഫറായിരുന്ന എസ്.കെ. മോഹനൻ തന്റെ വീടിനടുത്തുള്ള അമ്പലമായതിനാൽ തെയ്യക്കോലത്തിന്റെ ചിത്രമെടുക്കാനെത്തി. തെയ്യം ഉറഞ്ഞുതുള്ളുന്നുണ്ട്. ഇപ്പോൾ ഇവിടെ നിൽക്കുന്ന തെയ്യം അടുത്ത നിമിഷം ഓടി മറ്റൊരു സ്‍ഥലത്തേക്ക് മാറിയേക്കാം. അതിനാൽ തെയ്യത്തെ ബ്ലോക്ക് ചെയ്യുന്ന തരത്തിൽ വഴിമുടക്കി ചിത്രമെടുക്കാൻ മോഹനൻ തീരുമാനിച്ചു. തന്റെ വഴി തടഞ്ഞു നിൽക്കുന്ന ഫോട്ടോഗ്രാഫറെ, തെയ്യം അടിമുടിയൊന്ന് നോക്കി. ക്യാമറ ഫോക്കസ് ചെയ്യാൻ ശ്രമിച്ച മോഹന് സമീപത്തേക്ക് ദൈവം പാഞ്ഞടുത്തു. ഒരു നിമിഷം ഞടുങ്ങിയ മോഹനന് സമീപം എത്തിയ തെയ്യം ഫോട്ടോഗ്രാഫറുടെ കൈപിടിച്ച് ഉറഞ്ഞുതുള്ളി. ചെവിയിൽ അനുഗ്രഹം പോലെ മന്ത്രിച്ചു..... 'മകനേ...... എനിക്കിതിന്റെയൊരു.... കോപ്പി തരണം'.
ജോസ്കുട്ടി പനയ്ക്കൽ 2003 ഡിസംബർ
